- Бардык жерлерде биздин Өзгөчө кырдаалдар министрлигинин техникалары иштеп атат. Бирок чынын айтыш керек, бардыгына эле толук бойдон жардам көрсөтүү, же тез аранын ичинде болуп өткөн суу ташкындарынын кесепеттерин жоюу бизге кыйынчылыкка туруп атат. Ошондуктан күнү-түнү тынбастан азыркы күндө чараларды көрүп атабыз.

Кырсыктан катуу жабыркаган Карасуу районундагы Кызылордо айылынын өзүн тааныштырбаган тургуну Ош облус губернатору Аалы Карашевди сүйлөтпөй, эгерде Каттаталдык айыл өкмөтү, райондун акими былтыркы селден жыйынтык чыгарып, алдын алуу чараларын көргөндө бүгүнкү кейипти киймек эмеспиз деген нааразычылыгын билдирди:

- Бир нерсе болобу, же жокпу, болбосо өлөлүбү десек, болуптур кир дейт. Кирсек, оозубузду жаап, бүрсүгүнү келем деди. Андан бери бүрсүгүнү эмес, бир - бир жарым жыл болду, бир ирет текшерген жок. Эми азыр келе бересиңер, кете бересиңер эч ким карабайт. Биздин айыл өкмөттү иштесин деп шайлаганбыз.

Ушул эле райондогу Башбулак кыштагынын жашоочусу Медер Исаков суу ташкындан жердештери олуттуу зыян тарткандыгын, өзү да үй-жайсыз калгандыгын, бийлик алардын тагдырына көңүлкош мамиле жасап жаткандыгын:

- Суунун бийиктиги бул жерге бир жарым метрден жогору келди. Үйдүн бул жагынан кирип бул жагынан чыкты. Эч нерсе калган жок, үйдө жатаарга жерибиз жок. Машинабыз агып кеткен жерден жолдон кармап келдик, ичи толтура суу. Сарайдын арка жагы, мал чарба бардыгы өлдү. 12 жандыкка зыян келди.

Анткен менен Ош облус губернатору Аалы Карашев өзгөчө кырдаал министри Ташиевдин жана жергиликтүү тургундардын пикирине кошулбастыгын, алдын алуу жумуштары убагында жүргүзүлгөндүктөн адамдар өмүрүнө коркунуч туулбагандыгын, учурда кырсык баскан аймактарда санитардык жана ветеринардык көзөмөлдү күчөтүшкөндүгүн эске салды:

- Санитардык дарыгерлер көзөмөлдөп, үйлөрдү обработка кылып иштеп жатышат. Андан тышкары ветеринардык кызматкерлер үймө-үй кыдырып, бүгүнкү күндө жумуштарын аткарып жатышат.