Бул окуяга байланыштуу Грузиянын президенти сыналгыдан чыгып сүйлөп, Орусиянын президенти Владимир Путинден телефон аркылуу Грузияга каршы "душманчыл чабуулдарды" токтотууну талап кылганын бышыктады:

- Бул окуя Бириккен Улуттардын хартиясын одоно бузат. Көз карандысыз мамлекеттин аймагын башка мамлекет провокациясыз, эч негизсиз, бардык эл аралык эрежелерди одоно бузуп, бомбалаганы эл аралык агрессияга жатат.

Учак атып түшүрүлгөн окуянын алдындагы аптада Москва Абхазия менен Түштүк Осетиядагы мыйзамдуу органдарды "тааный" баштай тургандыгын жарыялаган.

Кремл жекшембиде грузиялык чалгын учагынын атылышына эч кандай тиешеси жок экендигин айтууда. Орусиянын аба күчтөрү бул күнү анын бир да учагы аталган аймак тарапта болбогондугун билдирди.

Бирок Грузиянын аба күчтөрүнүн башчысы полковник Давид Наирашвили “Азаттыкка” видеодон кол салган учак орустардыкы экендиги даана көрүнөөрүн бышыктады:

- Видеодон Абхазиянын Гудаута шаарында жайгашкан аба базасынан учуп чыккан МиГ-29 учагы биздин учакка жакындап келгенин, аны ракета менен атып түшүрүп, кайра Орусияны көздөй учуп кеткенин даана көрүүгө болот.

Найрашвили ошондой эле Грузиянын Ички иштер министрлигине тиешелүү болгон чалгын учагы Грузиянын аймагы аркылуу план боюнча учуп жүргөнүн билдирди.

Грузиянын коргонуу өкүлдөрү Абхазиянын куралдуу күчтөрүндө да, бул жумуриятта турган орус тынчтык аскерлеринде да учакты атып түшүрүүчү курал жок экендигин белгилешүүдө. Соңку окуяга байланыштуу Грузия кайрадан Орусиянын тынчтык аскерлерин эл аралык күчтөр менен алмаштырууга чакырды.

Былтыр да Грузия Орусиянын эки согуш учагы өлкөнүн аба мейкиндигине кирип келип, грузин-осетин чегарасындагы айылдын чет жакасын аткылаганын айыптаган. Москва ал жолу да бул айыптоону мойнуна алган эмес.